高雄台北六天自由行2011 - 第三日

第三日- 20/10/2011（星期四）  高雄 –〉台北 雨

今早在酒店食完早餐，退了房，便搭捷運去左營站（R16），轉乘高鐵由高雄市去台北。真失敗，應該於一抵埗高雄便去左營站買定飛，最多可有7折。即日買票，自由座NT$1,445。可能票價貴，所以乘客唔多，自由座就真係任你點坐都得。值得一讚就係高鐵既廁所，又乾淨，又先進。我地搭呢班車，最高時速276公里。我地趕不上10:54分既直通車，唯有搭11點班車，1點鐘就到達台北車站。

由於我地三天將入住台北車站旁的天成大飯店，check-in 時間準2點就準2點，早半粒鐘都唔得。於是乎暫放下行李於服務臺，便去酒店隔離既溫州小店醫肚。因台北落雨，在酒店房間小休一會。

出發前，在捷運服務臺買悠遊卡，其實等同香港既八達通，成人開咭NT200，票值$100，押金$100（扣除手續費，可退回部分押金）；便出發去國父紀念館（捷運國父紀念館站），點知一出地面又落大雨，我地唯有放棄去國父紀念館，而改去市政府站，逛逛統一阪急百貨，歎下咖啡，等無雨便行去台北101. 因太多遊客，我地無上去觀景台（每位NT400），祇再5樓逛逛，影下相。

又到晚飯既時候，我地便由101搭免费巴士出番市政府站搭捷運到位於西門町既熊一頂級燒肉料理 (NT599,食到嘔)。

食飽飽，逛咗一陣西門町，買咗浴鹽返酒店浸浸浴，消除呢幾日既疲累。

因落雨，無去到國父紀念館，五分埔批發市場，及饒河街夜市!!

溫馨提示：一到埗高雄便去左營站買定高鐵票去台北，最多可有7折。