大阪神戶京都自由行七天手記 2008

自從前年8月去完東京自由行之後, 我們就愛上了日本自由行。

經過3個月的research，在去年5月最終落實了的目的地 – 大阪、神戶、京都。

今次是同我家老板的波友及其太太一起去，4人行。

第一日 - 5月8日
2008年5月8日晚, 大約十點半就到達機場。我們今次乘搭星航SQ618班機, 遲了45分鐘起飛, 直飛大阪關西機場。6個多小時之後, 當地時間約早上9:30, 我們就到達關西空港。去到JR站,於是我們就直接入去買車票去大阪站。
由關西空港搭JR去大阪站車程大約一小時, 不用轉車。11點多便到達JR大阪站,在梅田站搭阪急電鐵一個站就到達十三站 (Juso)。 一出閘就有一間八爪魚丸店，於是我們買了一份有9粒, 入面有大大粒八爪魚肉, 熱辣辣, yummy。行约5分鐘就到達十三的Plaza Osaka Hotel。真開心，酒店提升我們入住比我原先booked的房間大8m,有23m那麼大，還有open kitchen。 另外lobby有電腦可以供免費上網。上房放下行李之後就展開我們大阪之旅。當然先醫肚，我們就在十三站附近的小店食串燒和炒拉麵和飲啤酒。

第一站 梅田。我們由十三站搭去大阪梅田。跟住我們就去了大阪站旁的Hep Five多層商場, 商場入面有兩條好大條的紅色鯨魚模型。上面有個紅色摩天輪, 我們就登上這市内的摩天輪一覽大阪梅田市景。跟住我們便慕名搵有個地方叫空中庭園展望台（梅田藍天大廈)，想到40樓觀看俯瞰大阪全景，（位于離大阪站步行約10分鐘, 近旁是最高級都市飯店「WESTIN飯店大阪」）。可惜由於迷失方向, 我們搵了好一陣子才搵到， 但因入場費不值而放棄。我們就到地庫有個叫”瀧見小路“ 拍照留念。

梅田藍天大廈前面有條地下行人通道, 差唔多有四百米長, 而條地道入口比较難搵, 過了條地道之後就係Yodobashi。 Yodobashi係一間有十幾層高, 出名賣電器的百貨公司, 不過除左電器之外，仲有好多其他, 好似服裝, 餐廳, 雜貨等。加上身心疲累, 最後誤打誤撞去了一間叫 ”ちゃぶ屋 とんこつ らぁ麺Chabuton”既舖頭食拉麵。間舖在Yodobashi 8/F内，細細間, 不過眼見都唔少日本人去食，拉麵又唔貴,而且味道唔錯, 另外仲有餃子, 幾抵食。食完拉麵之後只不過係七點幾, 我們便在Yodobashi shopping, 兩個男仕都各自買了一只手錶，跟住就搭車返酒店休息。

梅田藍天大廈

第二日 - 5月9日 
今朝8點早餐於酒店的頂樓，自助餐型式, 種類不算太多。

食飽之後就出發去今日本来計劃好的目的地 – 難波 (Nanba)，道具屋筋 (Doguya-suji)，黑門市場 (Kuromon)， 堺筋本町（Den Den Town），通天閣，心齋橋 (Shinsaibashi)和道頓崛 (Dotonbori)。

可是到了難波city那邊的出口出去，却搵唔到黑門市場，而且正落雨，我們便在“蓬莱包店“買了牛肉燒賣食。剛巧隔壁是賣平價票的店鋪（日本很普遍），我們便在那兒買了環球影城的入場券，平了320yen一張，抵！！！　

因落雨，看見對面有條街有瓦遮頭，於是走過去，原来是千日前商店街，一直行過去，便是道頓崛筋和心齋橋筋，其實係一條好長有蓋的商店街, 入面有好多大大小小的商店, 有食肆, 藥房, hello kitty專門店, Disney store, 彈珠機舖, 夾公仔舖等等,好多人, 好熱鬧。首先我們幫襯了“Ryugu亭“迴轉壽司的自助餐，壽司材料麻麻地，種類不多。

醫飽肚，跟住我們便逛心齋橋附近的高岛屋和大丸顶楼的催賣場，咩都有得賣。跟住就沿住千日前向心齋橋筋方向進發。行了冇耐, 就到達道頓崛川喇, 道頓崛川即係一條河,　由道頓崛筋穿過道頓崛川就係心齋橋筋, 即係另一條好多人的有蓋商店街。穿過道頓崛川條橋上面正正就係其中一個最多大阪遊客影相留念的地方, 即係成日都見到的固力果公仔招牌所在地。

行累了，我們就在McDonald歎下午茶，150yen有飲品和小吃如蘋果批，抵！
再逛了一兩間大的本地百貨商店，又要開餐啦！原本計劃去食出名的“蟹道樂“，但因朋友話太貴不值，我們便改了去食火煱Shabu Shabu。

道頓崛筋感覺比心齋橋筋多些食店, 例如四天王, 金龍拉麵等等。再行多陣, 跟住就行去心齋橋站搭JR去梅田再轉乘阪急電鐵回酒店休息。途中在大阪站內的Ikari超市買了圓圓的士多啤利同橙, 嘩！真係甜到入心。

   

第三日 - 5月10日

今朝8點就出發。今日早餐於酒店附近的MOS Burger。
食完早餐之後就在十三站搭阪急神戶線去”三ノ宮”站，今日的目的地 – 神户。
出了三ノ宮車站，我們便向山方向步行到新神户車站，沿住它的左手边有条小路上便是搭新神戶登山索道‘神戶夢風船‘纜車。沿途看到布引香草園和布引瀑布，俯瞰神户港全景。在纜車站旁的廣場，有美女在唱英文歌。有間手信店，賣很多花香的產品。

神户港

 

逛了一會，我們便坐纜車返回新神户車站，沿住指示牌，就行到北野異人館, 北野異人館其實就好似一個豪宅區咁, 有好多大大少少的獨立房屋, 而它的賣點係每間屋都有著唔同國家的特色, 例如英國館, 日中國領事館, 荷蘭館等等, 而每一間屋都可以入去參觀, 不過每間都要收入場費, 另外比較出名的有萌黃之館同風見雞之家。我們去北野異人館都是志在到此一遊, 對屋的外觀比起屋入面的擺設還有興趣, 所以我們係異人館行了一會, 周圍影些相便離開。跟据我家老闆觀察所得，其實很多日本人來這兒是拍婚紗照的。（因他無跟我們行入北野異人館的小路，而在大路邊飲咖啡歎件餅。）

北野異人館之英國館

我們大約1:00就步行回到三ノ宮站, 目的係要食神戶牛! 很快便搵到網友推介的 ”ステーキランド ＫＯＢＥ”。Lunch set有沙律, 飯, 炒雜菜, 仲有飲品添。於是我們就叫了最貴的"Kobe Beef Sirloin Steak"。过了一陣, 就有個年轻的廚師在我們面前煎神戶牛柳, 食完咁美味的神戶牛柳之後，埋單11920yen, 午餐来講當然係貴, 不過神戶牛柳喎, 叫做食過啦。

  離開餐廳, 之後就原路行返去JR站附近。JR站對出就係City Loop巴士站, 搭City Loop就可以到達我地下一個目的地 -神戶港。車上有位職員沿途介紹經過的地方, 不過當然係聽唔明的日文。30分鐘車程就到達總站神戶塔附近 - 美利堅公園。 神戶港震災紀念公園（神戶港震災Memorial Park）位於美利堅公園的東側，園內記錄著當年阪神、淡路大震災的悲慘情形。在震災中遭到破壞而坍塌的港口設施的斷壁殘垣、東倒西歪的街燈至今還保持震災當時的原樣，再現自然災害殘酷景象，供遊人自由參觀。適逢其會，看到很多日本年輕人在美利堅公園一起跳Line Dance, 女孩子穿比堅尼及五綵繽紛的裝扮。又有跳蚤市場，扒船比賽，和一隊未成名的樂隊在打band唱歌，相當熱鬧。

從神戶塔對出碼頭望過去Mosaic 的景色相當唔錯, 可以見到Mosaic的摩天輪。行幾分鐘就到達Mosaic, Mosaic係一個在海旁的商場, 商店唔係好多, 不過有部分地方幾開揚。從Mosaic的露天平台, 可以望返過去神戶塔同海洋博物館, 這個景就係神戶港最出名的view - 有神戶塔, 海洋博物館同Oriental Hotel。

由Mosaic行去阪急”三ノ宮”站都幾遠, 途中經過有蓋的元町商店街，行遍元町商店街需要1小時左右時間。南京街位於元町站附近，買完手信就步行到阪急”三ノ宮”站就再次搭阪急神戸線返去十三站。在”吉野家”食完簡單的晚餐後, 跟住就返酒店休息。

第四日 - 5月10日
朝早七點就起身, 梳洗過後就落lobby食早餐。食飽之後就出發去今日的目的地 – 環球影城, 即係USJ。去USJ可以由十三搭車去大阪站轉搭[ＪＲ大阪環状線<内回り>], 去到西九条站再轉[ＪＲ桜島線], 去到一個叫”ユニバーサルシティ”站落車, 出閘行冇耐就係USJ入口。由車站行去USJ入口會途經一個幾層高的商場, 入面好多舖頭都係賣USJ的紀念品, 亦有好多賣其他精品的,最易認就係Hardrock Café, 有大大個結他做招牌。由於去到的時候還未到9:00,已經有很多人排隊，大部分都係日本人, 又係唔少是學生。
我們係門口那個例牌景點 – 大大個會轉的USJ招牌影了幾張相之後就用前日買的入場券入場,同disneyland一樣, USJ都有d卡通人物走来走去同人影相。一入去首先係一條商店街, 有大大小小紀念品舖, 可以臨走先去逛逛。
我們第一個game去玩Spiderman,因那时才９点，唔使点排隊就可以玩。Spiderman個game係坐在架車上面, 架車會跟住路線行, 沿途會有3D 動畫同埋真實的埸景, 夾埋一齊就好似在城市入面咁, 幾刺激，好好玩, 係其中一個必玩的game。

第二個game去玩Back To The Future，又係唔使排隊就可以玩。基本上這個game都係坐在架车内搖搖下, 前面就係一個垂直的太空館天幕， 不過唔使戴 3D眼鏡。　跟住我們第三個game去玩大白鯊。玩完大白鯊之後都係11:30, 之後，我們兩對夫婦分道揚鏢, 相約12:45在Waterworld Live Show門口等，於是我俩去了看巡遊，有花車同卡通人物載歌載舞, 人物有snoopy, hello kitty, 芝麻街, 史力加等, 雖然唔係好多花車, 不過個巡遊比較多著重歌舞, 連卡通人物都識跳舞,巡遊個氣氛唔錯。當個巡遊就完的時候我地就即刻走去Terminator II 排隊玩喇, 入到去唔多人, 不過就等了好耐先開始。個game一開始有個女人走出來講日文, 只見日本人笑得好開心, 我們就完全唔知咩事, 之後又睇片, 真係覺得有d悶。再之後就入正題, 原來都係戴住3D眼鏡睇電影, 不過特別在間中戲入面的人物會走出來（即係人扮）, 叫做有點野睇。跟住我倆買了兩只火雞髀和啤酒醫肚。

差唔多12:45就去睇Waterworld Live Show。朋友已在門口等我們，他們已玩完Dream Ride (過山車)和睇Sherk 3D show， 但他們又已booked了畫人像畫，放棄睇show。 於是我倆便去睇，這個show都算係USJ入面最出名的一個show, 個show的演員會做高難度動作, 有打鬥, 爆炸, 跳水, 水上電單車，小型飛機…等等。我們覺得個show非常精彩, 睇完好佩服他們竟然可以在有限的地方做到那多唔同的動作/表演。睇完咁精彩的show之後， 我們再會合一起玩 ET Adventure, 這是小兒科玩意，但也不差。 

由於時間尚早, 我們離開USJ原路返回JR大阪環状線站去大阪城站。大約10分鐘左右就到[大阪城公園]站, 大阪城天守宮就在大阪城公園]站旁, 出站之後就沿住條河行, 我們行了幾分鐘已經成座大阪城響我們面前。大阪城非常之現代化, 它的左邊已經係一座電梯可以上去城入面!!! 其實大阪城外觀都幾靚。雖然大阪城細過姬路城好多，因姬路城佷遠，在神戶去也要一個鈡，車費千多yen。我無計劃去。聼闻去完姬路城之後可以唔去大阪城，不過其實大阪城附近的景色都不錯, 大阪城公園都幾大, 周圍都有好多銀杏樹,由於我們對大阪城的歷史同埋內部無乜興趣, 所以無入到去參觀, 我們只在外圍影了幾張”到此一遊”相就算。

之後就離開, 我們由大阪城的另一邊行返出去, 中途見到條護城河, 個view幾靚。行了無幾耐就到[森ノ宮]站, 由於時間尚早, 我們決定搭車去 [堺筋本町]，誤打誤撞去到前天我們想去的黑門市場，跟住逛到道具屋筋，我們買了一點餐台用具，之後向前行，原來前面便是我們前日去過的千日前，我們又重覆行程來到心齋橋，於是我們便在那兒一間叫“海鲜丼“的魚生店食魚生丼，真满足。（這店在上野（東京）我們已試過，大阪這間比較新鮮。）跟住就行去心齋橋站搭JR去梅田再轉乘阪急電鐵返酒店休息。

第五日 - 5月12日
各自在房間內食麵包及杯麵當早餐，之後於9點便出發，在十三站搭阪急京都線去“桂”站轉車到“嵐山”站，今日的目的地 – 京都。

京都距離大阪都幾近, 大約25分鐘左右就到。出了車站之後再跟住指示行, 經過嵐山公園，好快就去到渡月橋, 行呢段路很舒服, 我們沿住渡月橋河邊行, 一路都有餐廳同食檔, 另外有好多人力車, 車夫会帶你遊覽附近的景色。桂川和渡月橋的風景如画，沿路有指示牌標明去天龍寺和嵯峨野小火車, 因時間關係，我們無入到天龍寺去參觀。

  到了嵯峨野小火車站，買了車票，等待上車時，買了一杯咖啡,那印住“嵯峨野“的杯可以keep住留念. 嵯峨野小火車係一輛行駛亀岡站同嵯峨野站之間, 專門俾乘客欣賞沿途風景o既火車。小火車主要會沿住保津川而行, 坐o係小火車入面就可以欣賞到保津峽同保津川o既景色。

我們由嵯峨野出發，我們好彩搭到第5車卡，第5卡係特別車卡, 好開揚, 車頂用玻璃建造, 冇窗, 所以坐這一卡欣賞風景會特別有風味，可惜我們被安排坐到最後，有玻璃窗阻擋。沿途風景如画，由火車向下望大部分時間可以見到保津川, 時而見到激流船, 船上同小火車上的人亦會互相揮手, 好有趣。我們又越過高山又越過谷, 慢慢地欣賞一下保津峽和保津川的美景。
經過30分鐘的旅程，就到達嵯峨野小火車的龜岡站，一出站就好似去了郊區，站隔離有間地道手信舖, 舖頭隔離有幾個好日本女孩的稻草人公仔。行了10分鐘左右就到馬堀站, 馬堀站好細, 附近全部都係農田同矮屋仔。
我們由馬堀站搭車到JR京都站.由京都站一出就係一個好大型的商場, 叫”伊勢丹”, ”伊勢丹”好大, 大約有十層, 好現代化。我們午餐於伊勢丹10樓的“三尺三寸箸“自助餐廳，健康又好味。


午餐後我們行了伊勢丹10樓的“Skyway”， 對面是”Kyoto Tower Hotel”。
由於京都地旅遊景點多數都係廟, 寺院之類, 好多都冇鐵路直接到達, 所以遊覽京都搭巴士反而方便。巴士站就在京都站出面, 巴士站好大, 有好多唔同的巴士路線, 可以去到大部分旅遊景點。我們首先在巴士站隔離的”総合バス案内所”買了張巴士1日pass, 京都的巴士多數都係220yen一程, 無論搭幾個多站都一样, 而巴士1日pass只不過係500yen, 即係搭3程就可以回本。 

  下一個目的地係清水寺, 買完pass之後就去搭車, 等左好一陣子至上到206號巴士去清水寺,大概10分鐘就到「清水道站」, 落車後都係跟住其他人行, 沿途都有買手信/精品舖頭,行左大約十分鐘就到達清水寺門口。收費之後就入寺參觀，行左無耐就到左好出名的清水舞台, 佢係靠139支木支撐住, 完全無用鐵釘,由清水舞台望出去就只有一片蔥綠樹林, 小部分樹變成黄黄一片。

清水寺

之後就去下一個景點 - 地主神社。地主神社就在清水舞台隔離, 行上一條短樓梯就到, 門口仲有好大個” 緣”字。地主神社範圍其實好細, 差唔多一眼就睇晒, 入面只有一條路, 兩旁有祈福的祭壇,和神像, 呢度係出名祈求姻緣的地方, 所以有好多年青情人和学生去。 之後再順住條路行, 就到了 ”音羽瀑布”, 音羽瀑布亦係另一個出名的景點, 佢有三道泉水, 聽講話分別代表健康,美麗同財富, 只要飲泉水就可以得到三樣。突然下雨，我們便再行番出去清水寺門口, 清水寺隔離有條石路, 係清水坂, 清水坂兩旁有好多手信小舖。行完清水寺就會轉入三年坂, 三年坂同清水坂一樣, 都係好多手信舖。
來到大路，我們便搭巴士到祗園，經過八阪神社，一心想睇藝妓，但行了成條街和花見小路，都無見到半個。由於疲累，便搭207號車兜了一圈京都市，於四條通大街下車，沿住呢條街直行就會到鴨川大橋, 過了鴨川大橋不遠就係我地下一個目的地 - 四條河原町，又係好似心齋橋的商店街, 沿途都有買手信/精品，跟住又係醫肚時間，躊躇緊食甚麽時，又睇到“海鲜丼“的魚生店，再食魚生丼，很满足。之後便搭阪急京都綫離開河原町返到十三站，返酒店休息。

第六日 - 5月13日
各自在房間內食麵包及杯麵當早餐，之後於10點便出發，在十三站搭阪急寳塚線去池田站，滿壽美町出口步行約５分鐘，便到日清即食麵博物館，在門口和安籐百福的銅像拍照，參觀完博物館後我們還自己製造杯麵，自己選料，好玩！
 
之後在池田站旁的西日式餐廳食午餐，餐茶自助任飲， 我食的是日本咖喱菜加蛋飯，清淡健康好味。

午餐後，我們兩對夫婦分道揚鏢，我倆便囘酒店放下我們於日清即食麵博物館和池田的超市買的手信後，跟住便搭車去梅田作最後沖刺，在阪急，阪神百貨公司的催賣場花了整個下午，我倆終於滿載而歸（我家老闆又買高爾夫球桿，唉！）在新梅田食堂街食完豐富的晚餐後，我倆便搭車返酒店休息。途經十三那麵檔，發覺有開檔，我家老闆終於忍不住口，雖然飽，都係食左碗招牌拉麵。满足！

第七日 - 5月14日
各自食早餐後, 我們於11點多便check-out酒店，寄存行李於酒店之後便逛已住了6日的酒店附近的十三町，之後在一間在門口自己先入錢買飛order食物的地道食店，樓上雅座，白飯任食。在出名的Mister Donut買了5個donut給奶奶，之後便囘酒店取囘行李，1點半出發出機場。今次我們改搭於梅田站開出的機場巴士，可看不同風景。到機場才2點多，check-in 完，我們便在機場的手信小舖買糯米糍和“雪之戀人“白朱古力餅（只有在機場才有得賣，除了北海道）。
SQ621 準時4點55分起飛。 再見啦！大阪！

10點半（新加坡時間）抵達新加坡。 Home Sweet Home!