人整我又整之。。。。焗鬆餅（Scones）

好耐之前睇過Blog友們跟T&P整比較健康（無牛油）既焗鬆餅，已好想好想整黎食，因好懷念以前香港KFC有賣過既焗鬆餅。

呢排我既baking慧根突然開竅，星期日一早食完早餐又去買料開工。

睇完T&P既Lemonade Scones 大揭秘Video, 就有樣照樣整，掂喎！ 我成功喇！

一整就整咗18個，趁新鮮滾熱辣，送咗8個俾两家好鄰居兼好友； 其馀十個作為我一家既午餐。

因今次是初試啼聲，不知成功與否，廢事晒料，所以呢個鬆餅係無放其他材料如cranberry等，但我地食時搽jam都一樣好味！我家老闆話下次整最好落D鹽會好味D喎!

材料 :

Self Raising Flour自發粉        三杯    ( 為好計數我用咗 900g )

Thickened Cream  淡忌廉      一杯    ( 1 瓶 300g)

Lemonade或7-Up 汽水          一杯    ( 我用番個忌廉既樽去量 300g)

做法：

1.      將自發粉過篩  ,

2.      將忌廉 和 汽水 攪勻, 加入麵粉中,

3.      用一把餐刀劃十字般將麵粉同混合物撈勻，成為麵糰 (撈勻就好， 切勿撈太耐, 不然鬆餅焗出嚟會唔鬆 )

4.      將麵糰堆成球形，然後壓平至大約2cm厚； 用圓模把麵糰吸出一個個圓型

5.      儘量排密少少以防鬆餅麵糰倒塌

6.      放入預熱焗爐 220c 焗15 分鐘即成 

好友飯聚

上次我們的好友從澳門放假回星，我們一班友好便出黎飯聚。今次饭聚 既地点係Marina Mandarin既AquaMarine,  因其中一對夫婦是酒店既members, 除有折扣外，仲有紅白酒送， 而且可定到全餐廳唯一一張十人大圓台，方便傾談。 但以這自助餐既價錢，對食物的期望卻有點兒失望。

人整我又整之。。。。Cranberry Scones

上次跟T&P既Video整scones好掂（但無乜味 道）； 所以今次又整，以 3:1:1 既比例，用咗600g 自發粉(self raising flour)，200ml 淡忌廉(wripping cream)，200ml 7-Up， 加咗cranberry 同一點點鹽 （可做16個）。 今次效果唔錯，唔洗搽jam或牛油都好味！

人整我又整之。。。。香檸芝士蛋糕

我真係唔應該睇廚林高手們的blogs。

一睇完blog友MoonMoon既檸檬芝士蛋糕，就好想食。 

明日我家老闆就返歸，一心想整個芝士蛋糕俾佢一個surprise，順便代女兒補祝佢既父親節。

我從未用過既mixer終於大派用場。

材料：

消化餅6-7塊, 牛油1/8份，忌廉芝士(cream cheese) 250g，糖50g，鮮奶1/2 杯，淡忌廉 (thickened cream) 150g，魚膠粉2茶匙，檸檬1個(皮刨茸及肉榨汁）
6吋(15cm) 圓模一個 (底可移動）

做法：

1。 先把牛油座熱水至完全溶 解                                                                                      

 2。 把消化餅壓碎并加入已溶既牛油，攪勻及倒入圓模内，用匙壓平，放入雪柜冷藏
3。  忌廉芝士及淡忌廉打勻至完全混合好
4。  分別加入鮮奶，糖，魚膠粉，并打至滑身
5。  最後加入檸檬皮及檸檬汁打勻
6。  把混合物倒入圓模，放入雪柜冷藏至凝固即成

你地會好奇怪，明明材料寫thickened cream, 但我幅相係whipping cream..................

因我亂咁嚟， 買thickened cream 又買錯 whipping cream.  不過唔理喇，照做！

 

其實我做得唔係好好，將圓模取出時令糕邊一岩一孱，好肉酸, 所以用blueberry圍邊去遮醜！

人整我又整之。。。。意大利香草包 (Focaccia)

最近見blog 友們整意大利香草包，睇見都流口水。好，請教完前輩MD，就dick起心肝整我一生人第一次學整的香草包。

我家老闆見我興致勃勃，星期六一早就同我去買齊材料，黃昏回到家中就開工，佢仲期望可帶一兩個麵包明日出國在晚間肚餓時食。

跟據份量，把麵糰搓好，等發酵四十分鐘，又搓多十分鐘，又等發酵二十分鐘；

           

然後一開四份，壓平佢地，又等發酵四十分鐘。預先整熱個焗爐，把麵糰放進焗爐以180度焗二十分鐘。嘩！睇見D麵包開始成形，好開心，以為好掂。。。

唉！無天份就係無天份！我既意大利香草包已出爐，可惜變成意大利香草特超硬豬仔包，可以掟死猫！

我家老闆對我真好，明知食石頭，都帶两個上機。。。真係無言感激！

各位前輩們，請問我衰邊樹？