人整我又整之。。。。第一次學人煮的餸菜

噚日星期日同我家老闆出去牛車水(China Town)食早餐兼買餸。 突然想起MD既Shepherd's Pie , 如月既港式咖喱魚蛋及去骨雞翼，最近blog友們都有整既叉燒，樣樣都好想食，所以買齊材料，無事做就在家玩煮飯仔。

我家老闆見老婆咁有閑情逸致整餸， 就請埋老友兼街坊兩家人黎飯聚做其白老鼠。

CottagePie                                                                                                                            

 材料： 薯仔3個，牛油10g, 牛奶1/4杯，洋蔥1個，免治牛肉300g
1. 把薯仔煲淋，去皮，壓爛
2. 加入牛油； 續少加入牛奶， 攪至薯蓉比較幼細， 待用。
3. 免治牛肉用生抽，糖，鹽，胡椒粉，少許水，調味。
3. 把洋蔥切細粒，下鑊炒熟，落少少鹽。
4. 把免治牛肉和洋蔥一齊炒至牛肉半熟，放入盤內。
5. 把薯蓉鋪平在牛肉上面。
6. 放入焗爐，焗至薯蓉面至金黃色即成。

露筍釀雞翼                                                                                      材料： 雞翼20隻，小露筍10條, 西芹一條，紅蘿蔔1/2個
1. 把雞翼去骨，用生抽，老抽，糖，胡椒粉，薑汁，紹興酒調味，醃一小時
2. 把小露筍，西芹，紅蘿蔔切成條狀，長度跟雞翼一樣，用熱水加鹽煮至七成熟。    3. 把小露筍，西芹，紅蘿蔔放入雞翼內。
4. 小心把雞翼兩邊煎至金黃色即成，上碟。

咖喱蘿蔔魷魚魚蛋材料：魚蛋半kg (約15粒），白蘿蔔1個，魷魚1隻(已發), 麵豉醬3湯匙，咖喱粉半包
1. 白蘿蔔切件，先用水煮淋，白蘿蔔連水待用                                                                2. 把魷魚洗乾淨，出水, 切片
3. 用蒜茸起鑊爆香麵豉醬，加入魷魚, 魚蛋兜勻，再加入咖喱粉兜勻
4. 倒入蘿蔔連水，以浸至魚蛋一半為準，加入鹽，糖調味
5. 搇蓋炆到汁收至一小半即可。

               

  Upload 相時先發覺唔記得替製成品拍照。

蜜汁叉燒

材料： 半肥瘦豬肉500g
1. 把豬肉洗乾淨抹乾，用叉燒醬，五香粉，胡椒粉，玫瑰露酒調味，醃兩小時
2. 把醃好既豬肉放入焗爐，焗至兩邊熟透
3. 搽蜜糖（用水溝稀）於豬肉一邊，待焗至有微燶； 重複於另一邊
4. 即成，切片上碟。

最後，當然唔少得朋友太太既美味甜品。。。自製萍果批。。。

人整我又整之。。。。薑酵素收成

等咗一個月，終於收成喇！

同橙酵素一樣處理方法：
1） 用篩隔去姜楂，把酵素入樽。（樽一樣要用熱水消毒及風乾）

2） 用攪拌機把薑楂打爛，再用篩隔出酵素，把這次的酵素放入另外一個樽，因為今次帶有薑泥。                                     

薑酵素有保健功效，包括防癌抗癌，抗脂肪，抗氧化，發汗，治感冒，減輕嘔吐，噁心，抗凝血，預防膽結石作用等。

衣櫃與貓

今日我家老闆打開了衣櫃門攞衫，忘記關門，我家兩個貓囝囝就拿拿臨走入去當貓樹新樂園咁玩，攪到我家老闆既褲全是貓毛，工人有排攪。

人整我又整之。。。。橙酵素 （減肥酵素）

好心急，未等到薑酵素收成，又學人整橙酵素。 本來呢個酵素係減肥酵素，弊加火，整到一半，先發覺唔記得買有機萍果醋。打電話俾師父MD求救，她就叫我將錯就錯，唔放醋，兩個星期就可收成。

材料：

橙                    3個

檸檬                2個

黃冰糖            400g

1）   先洗乾淨玻璃樽，用熱水消毒及風乾。
2）   先洗乾淨砧板和生果刀，用熱水消毒及風乾。

3）   把橙及檸檬洗乾淨，風乾，去皮去核切片

4）   把橙，檸檬和黃冰糖，依比例 2份橙，1份檸檬，1份黃冰糖；依次序一層，一層放入玻璃樽內，最後一層是黃冰糖。不要放滿，留一點空間。

5）    封蓋； 并放在陰暗處兩個星期。

6）   兩星期後，用篩隔去果楂，把酵素入樽。（樽一樣要用熱水消毒及風乾）

7）   用攪拌機把果楂打爛，再用篩隔出酵素，把這次的酵素放入另外一個樽，因今次帶有果泥。     

8）  把酵素放入雪柜，可存放一個月。
9）  每天空肚（餐前）飲3次，每次30ml；可加冰或水飲用。

 

等我得閑上下磅，睇下飲完有無瘦到先！

環保貼士：

不要浪費，把果皮做酵素， 可用黎清潔蔬菜，水果，更可以清潔傢俬。

做法：一公升水+300gm果皮+100gm冰糖，放入無用的汽水膠樽內，待發酵六個月（在此期間，要隔日打開樽蓋放氣一下），即可當洗潔液用，無须隔楂。

[得唔得就唔知，我未試過，呢個環保貼士係在某雜誌抄寫的]

猫腩肉

Mocha 愈黎愈肥，就愈黎愈懶，常常死屍般躺在地上，不大願走動。

嘩！貓腩肉呀！