人整我又整之。。。。薑酵素

上星期六與bloggers有飯聚。 女主人MD俾咗幾隻酵素過我地試。難得我家老闆鍾意薑酵素，MD仲好熱心於第二日一早俾咗D links 過我参考, 真係感激。  好!  就dig 起心肝，買齊材料，又學人發姣。。打錯字。。發酵先啱！

材料：
薑               700g
檸檬            2個
黃冰糖         400g
有機萍果醋   1瓶

1） 先洗乾淨玻璃瓶，用熱水消毒及風乾
2） 把薑及檸檬去皮切片
3） 把薑，檸檬和黃冰糖，依次序一層，一層放入玻璃瓶內，最後一層是黃冰糖。不要放滿，留一點空間。
4） 最後把有機萍果醋倒入瓶內，封蓋。
5） 放在陰暗處一個月

好喇，寫住咁多先，等一個月後再續。。。。

心太軟

上星期日（7-11）世界杯final，老友攪咗個小型飯聚。 我家老闆一早定咗隻乳豬。主力準備食物係女主人，她雖是職業女性，但煮西餐好掂，是晚她的前菜是田園沙拉，西式雜菜，青瓜釀雞蓉；主菜是香煎牛脷， 西煎豬脛肉。 朋友S又買咗雜錦壽司。 啤酒，紅酒，白酒，梅子酒（自製）任飲，誓要不醉無歸！ 全晚我最欣賞係女主人既甜品- 心太軟。 全是剛剛出爐，熱辣辣，配以小桃，車里子，仲有好好味既Blackforest 雪糕，yummy!

她還教了我們心太軟的做法：

用具 : 圓形或心形的模

心太軟朱古力材料 :
A)  53-55% 黑硃古力 140g
B)  無鹽牛油 50g
C)  全蛋1隻
D)  低筋粉 25g (預先過篩)

1） 將朱古力隔熱水座溶, 然後加入巳溶的牛油拌勻備用.
2） 將蛋放入大盤內打勻，再將 1）的朱古力漿加入拌勻。
3） 最後將低筋粉加入朱古力漿拌勻
4） 把拌勻的材料放入涂了牛油的模內
5） 放入雪柜3-4小時待用
6） 焗爐用200度預先預熱15分鐘，把朱古力漿連模放入焗爐焗10分鐘
7） 出焗爐後待涼1-2分鐘，便可脫模，上碟。

胡明市自由行手記2010之…後語

胡志明市無貓？五天裡面，無論市區，郊外，都見唔到貓貓，只有狗。

 

錢幣找換 – 發覺Blog友推介既金鋪找換率最高，如你將入住Le Thanh Ton 街的酒店既話，可到161 Le Thanh Ton Q1呢間金鋪找換。

 （這相片取自某Blog友）

参加The Sinh Tourist 既Mekong Delta Trip - My Tho 美拖 & Ben Tre 一日遊真抵玩； 古芝地道就一般。

過馬路 - 其實在主要道路都有交通燈（俾揸車人士睇既），順住他們既去勢，我們慢慢向前行，就好容易過到馬路,都唔係我地想象中咁差;司机們一定就到我們。

我地無刻意去出名既Le Bordeaux，Vietnam House, Temple Club，Pho Hoa, Pho Li, 又無去 Nhu Lan 買扎肉。  只是隨緣，行到邊，食到邊。來得開心就好！

小心財物,怕俾鐵騎士搶手袋? 好彩無事發生,我們一到步就將護照及一部分財物放存在酒店房内的保險箱裡。  其實無論去那個國家,都有不法之徒,只要自己小心點,就會無事,開開心心享受假期!

去完越南，我發覺自己真是身在福中，在一個安穩的社會成長，没有經過戰爭的痛苦。。。

願世界和平！

胡志明市自由行手記2010…第五日

5/7/2010  星期一  晴

TR 2323     ETD: 14:25     ETA:  17:25

食過早餐，到及酒店附近的店鋪去作最後衝刺。在檳城市塲仲見到班日本攝影隊在拍旅遊節目。

為咗再食多一次清平食館， 我倆提早15分鐘check-out，放低行李於酒店服務臺，隨即過對面既清平再食燒肉米紙卷， 蟹蚶雞肉河粉，芒果沙冰。今次坐樓上雅座，今日既燒肉差咗少少，但都好好味。臨走時，班日本拍攝隊都黎清平幫襯。

酒店服務臺替我地叫咗部Vinasun的士，他話我知出機場大約半粒鐘，約VND130,000 （包括什麼什麼機場費）。正確，連貼士剛好VND130,000.

Check-in 完行李，仲有大把時間，就喺機場逛。

（搬家後-雅烏搬到博客，唔見咗D相）

虎航都好準時，準2:15pm就起機。

開心既時候過得真快，五天假期就咁渡過咗！

胡志明市自由行手記2010…第四日

４/7/2010  星期日  晴

一早6:30am食早餐，7:30am 就步行到Sinh Tourist。　準準8:15am開車，出發到古芝地道去！車程兩小時。今日全車滿座，那導遊阿伯好似好 professional 咁（其實唔是囉），沿途不停講解，直至出咗市區才休息。在車上，佢明明叫我地每人預備VND75,000，話落車時收錢幫我地買入場券；點知落車後又叫我地聯合國團友排隊自己買飛，價錢又有出入，變咗VND80,000一位，攪到好混亂。擾嚷一番，仲於入得場。　
好多Blog友已介紹過古芝地道，不想重複。
（搬家後-雅烏搬到博客，唔見咗D相）
 

最激氣係呢位導遊阿伯無帶我地去食木薯，我地有買飛食架，我check 過啲飛，VND20,000 係入場費，VND20,000 係睇video費，VND20,000 係入洞費，VND20,000 係食木薯費，共VND80,000 。　唔知佢係唔記得，益或佢要趕下場；我問佢點解我地賣咗飛但無去食木薯，他支唔以對，又話嗰張飛係睇會議室?!  吓！咁都得？！

該活動於下午1點鐘解散於The SinhTourist。

從到胡志明市既第一日，已想試越南通介紹既清平食館，今日終於有機會喇！我地坐樓下，可以睇到好多小食。 我家老闆點既係清平食館出名既燒肉米紙卷，我既係蟹肉春卷檬，又試咗豬肉卷，蔗汁糕，蓮子羹，椰子沙冰（Sinh To）。包埋啤酒凍茶，都唔洗VND200,000 。

食飽飽，返酒店hea. 等太陽落山，我地就去昨晚定咗枱既Oscar Saigon Hotel食海鮮buffet.

到咗酒店既頂樓，經理仲認得我地；我地張二人枱在大玻璃窗前，仲又我家老闆的名字在枱上，他們的服務真體貼。 窗外風景好靚，又有柔和音樂。So romantic, 剛好同我家老闆預早興祝他牛一。紅酒，白酒任飲，除咗海鲜,原來仲有火煱，有好多菇類同菜，最啱我口味。雪糕雖然係普通軟雪糕， 但都好香好滑。呢餐好滿足！好抵！

胡志明市自由行手記2010…第三日

3/7/2010  星期六  晴
今日無報團，好優閑，8點鐘先起身食早餐。 咦！早餐有新花款，原來每天都有小小改變，我鍾意！

今天第一站本是統一宮，從酒店步行去只要20分鐘路程，但去到門口，前面一大班遊客，我家老闆無乜興趣，我地便再向前行約10分鐘就到了戰爭博物館（War Remnants Museum）- 入場費VND15,000。

（搬家後-雅烏搬到博客，唔見咗D相）

 

下一站係聖母大教堂同郵政局，由於天氣太熱，道路繁忙，我地祇遠觀及拍照留念，到此一遊就算喇！好多Blog友都喺佢地既網頁已posted過好多裡面的相片，已大概知一二。

（搬家後-雅烏搬到博客，唔見咗D相）
 
一路行落去就係 Diamond Plaza， 歌劇院，過對面馬路，就見到Thuong Xa Tax(國營百貨店 - 135 Nguyen Hue Blvd)，我地就入去涼冷氣。話明國營，無乜驚喜，就到二樓既超市逛， 呢度買手信一流，你可以慢慢睇，慢慢揀，唔洗講價；Linh咖啡粉200g + 送過濾器， 都係VND36,500, 送禮最好。

我地買到一袋二袋，想再行去　Dong Khai Road（同起路）都唔得，便行去酒店附近間 Quán Ăn Ngon 美食大排檔  (越南文"An Ngon" 解 "好食")去醫肚。當時已兩點多，仲係好多人，等咗１０分鐘就有位。　侍應俾咗張單過我地，我地眼闊肚窄，失控地去每個檔口點啊點，等到侍應送我地啲食物黎先知死。。。３碗粉，一碟蔗蝦，一碟春卷，一客燜牛腩（跟麵包上），兩枝啤酒，一杯椰汁綠豆冰；承惠VND497,000。

地址：160 Pasteur, P.Bến Nghé, Q.1

 

食到飽到嘔，便步行返酒店ｈｅａ．　

等到太陽落山，我地又出發去Dong Khai Road 行街街，跟住行出碼頭，打算上船遊西貢河，食飯睇表演，但晏晝食得太飽，聽聞又係麻麻，放棄！

 

緣住Nguyen Hue Blvd，見到好多酒店都有week-end buffet．經過比較，我們決定去Oscar Saigon Hotel　定咗位明晚食buffet．每位VND190,000，　好似好抵.

行下行下又 返到酒店附近，呢幾晚返酒店都見到一檔街邊河粉擺在酒店門口對開兩個鋪位，今晚又見到佢地開檔，又好似好乾淨，我地就膽粗粗試下踎街食野既滋味，橫掂我帶咗醫生俾我啲平安藥。手指指叫咗兩碗牛丸河粉，咦！出奇的好味喎，反而係我地喺胡志明市食咁多碗河粉最好味的一碗，仲係VND25,000一碗，平靚正！ （食後我地無肚疴，唔口渴.）

買完遊客價既水果（超貴），打包兩杯蔗汁（VND6,000一杯），就返酒店開水果餐，早點休息，準備明天一早出發去古芝地道！

胡志明市自由行手記2010…第二日 （下）

報完名去古芝地道，我倆就步行回酒店，途經Pho24，已見Blog友彈過，但都抱住一試的心情去食；真的好失望，牛雜河（beef special）啲牛雜唔霖；服務態度差，可能得我地一台客，所有侍應生,　廚師，連洗碗阿嬋都在睇電視！又漏單。。。

梳洗完，我們便出發到Fanny Ice-cream 食ice-cream buffet。從網上知道逢每月既第一個星期五，由6:30pm 至 10:30pm, Fanny 推行任食buffet,祇收VND95,000.  好似好抵！ 適逢其會，就試一試净食雪糕，唔食飯既感覺。點知去到人山人海，大部分是越南客人，想打退堂鼓，我家老闆話既然黎到，就試下啦！咁！我地就喺入面逼黎逼去食咗幾球雪糕，就走人。偷雞唔到蝕揸米！

本想再去食Fanny Ice-cream 隔離既Temple Club，嘩！門口好有特色！但吞咗幾球雪糕，都仲未有胃口食飯。唯有放棄！

於是慢步行Le Loi （街名），經過Saigon Centre， 全是入口貨，睇下無妨！行下行下又到檳城夜市，開始有點肚餓，就在路邊試下地道海鮮。
嘩！2隻燒大頭蝦，2碟東風螺（一碟得6隻），1碟蒜蓉炒蜆，2條春卷，2枝西貢啤酒，一杯凍茶，承惠VND575,000。 以街邊貨色就貴咗啲！

飽暖思床褥，回酒店教教豬。我家老闆就睇世界杯。