高雄台北六天自由行2011 - 第二日

第二日- 19/10/2011 （星期三）   高雄     晴

在酒店食過豐富既早餐，便開始我們今天的行程 - 打狗領事館，旗津及愛河。 因我們下榻的酒店很近捷運，便搭捷運到西子灣站(O1)。 打算在西子灣站2號出口, 坐接駁車“橘1“ 公車去打狗領事館。 點知一出地面，就有位的士叔叔前來兜搭，話搭佢既車仲平過搭公車，而且唔洗等； 但睇見佢架車係4座位，我地6個人，點坐呀？ 佢死話得，於是乎兩位瘦小的團友夫婦坐在前面，我們4個坐後面。 其實路程都唔近，要行都有排行，NT100就真係超值。到達目的地後，佢仲話等我地，再載我地去鼓山渡輪站，都係NT100。我地心諗， 有客睇佢等唔等我地？！
點知喺打狗領事館影完一輪相，落番黎，那位的士叔叔真係喺到等我地，唔通真係無客？於是乎又6個逼埋一架車去鼓山渡輪站過去旗津市。真係好多謝呢位的士叔叔，無佢，可能我地會花好多時間喺交通上。

渡輪樓上人坐，樓下車坐，好有懷舊feel. 乘客每位NT15，要入錢上船；雖不設找續，但有位小姐專門幫搭客唱錢。

其實旗津好似香港既離島咁。 因到旗津只是早上11時多，旗津大街很多鋪頭及檔口仲未開曬檔。我地便行去旗津海水浴場逛逛影影相，之後便去食海鮮。海鮮餐館成行成市，見近海水浴場既冠洲既海鮮好新鮮，就幫襯呢間啦！羊群效應，初時得我地一枱，食食下已全場滿座。

食飽飽，便去做運動。 我地6人租咗3架“電”動單車 （NT400-2個鐘），暢遊旗津市。由旗津大街，經旗津海岸公園，到風車公園，停下影下相，來來回回剛好兩粒鐘。在旗后觀光市場買完手信，本想搭船由旗津到愛河，點知呢條航線祇在假日服務，為免舟車勞頓，我地便搭乘一架7人的士（NT600-一口價，無睇錶) 經海底遂道直去愛河。

 

旗津海岸公園内的廁所

旗后觀光市場

因愛河係熱門旅遊點，一批一批既遊客等上爱之船（NT80-15分鐘旅程）。船上有導遊講解愛河的故事。遊完船河，便緣住愛河行至家樂福。一心以為有食肆，點知去到餐館執咗笠，得一個Food Court, 個場就大，但得兩檔，一檔賣水餃，一檔賣韓國火窩，拉面。要醫肚，無辦法，唯有有乜食乜。食完一個所謂晚餐，便到家樂福shopping，行得好舒服，有冷氣，又少人，所以一致決定，放棄去六合夜市，便在家樂福買咗好多鹵味同巨峰提子，再在7-11買啤酒，返酒店開餐。

溫馨提示：旗津風車公園真係好遠，如要行去，行到腳都拐都未到。

高雄台北六天自由行2011 - 第一日

我同我家老闆因出席老友女兒在香港的于歸之喜酒席， 順道與香港舊同學兼老友一行六人，組成“三百傲遊團” 由香港出發，暢遊台灣。

 
經過多月来的資料收集，令到呢個自由行非常充實，開心！
第一日- 18/10/2011 （星期二）   香港-->高雄   晴
我們乘搭“港龍”於下午二時多到達高雄小港機場；  步行到距離機場不過5分鐘的高雄捷運(R4)站， 乘搭捷運到高雄市美麗島站轉橘線至信義國小站（O6），於4號出口，步行約3分鐘， 便到達我們入住兩晚的高雄商旅飯店。

放下行李，便去酒店附近的食店醫肚。

食飽飽，便搭捷運到中央公園站 （R9）的 “新堀江商圈“ 同 “原宿玉竹商圈“ （圈 = 商店街），那裡多是年輕人的時裝。

逛了一圈， 便搭捷運到凱旋站（R6)，坐免費接駁車到“夢時代購物中心“逛。 在頂樓坐坐摩天輪（NT150），看看高雄市的夜景。

再到位於巨蛋站（R14）的瑞豐夜市去試地道小食。瑞豐夜市除了小食,仲有衣服鞋襪及遊戲攤位，好不熱鬧！

溫馨提示：瑞豐夜市逢星期一，三休市

莆田晚飯

好耐之前去過City Square 既莆田食晚飯， 當時仲係buffet形式，好抵食。
上星期同我家老闆倆個去撐台脚，點知去到原來已改為點菜食飯，既然來到，就叫咗個二人套餐。。。唔！ 水準都唔錯，樣樣餸都好好味。。。除咗碗羹之外。

喺呢度食飯，仲有免費娛樂，下面廣場有一班人跳Line Dance, 好不熱鬧！